Македонија загуби во првиот пријателски натпревар во Каиро

Египет - Македонија 32:25 (12:10)

Ракометната репрезентација на Македонија попладнево загуби на гостувањето во Каиро со 32:25 (12:10) во првиот од двата натпревари против Египет во рамките на ЕХФ неделата резервирана за меѓународни контролни натпревари. Избраниците на селекторот Кирил Лазаров одржуваа резултатска неизвесност до 42. минута, кога домаќините со серија од 4:0 стекнаа предност од 23:18, која до крајот на натпреварот беше недостижна.

Најефикасни во македонските редови беа Филип Талевски со шест и Филип Кузмановски со четири голови, а голманот Никола Митревски запиша 11 одбрани.

Македонските ракометари ќе имаат шанса за реванш против истиот противник утре во Каиро со почеток во 17:00 часот.

Двомечот против Египет е во рамки на подготовките на македонските ракометари за настапот на Европското првенство во 2022 година, каде Македонија е дел од групата во Дебрецен против Словенија, Данска и Црна Гора.