Лазаров: „Барселона секогаш беше мојот прв избор„

По потпишувањето на новиот двегодишен договор со Барселона, најдобриот стрелец по пролетните натпревари во Лигата на шампионите, Кирил Лазаров за официјалната телевизија на клубот, БАРСА ТВ изјави:

„Среќен сум, одсекогаш Барса беше мојот прв избор. Од мали нозе сонував да играм за овој клуб. Задоволен сум. Сакам да му се заблагодарам на клубот, стручниот штаб и соиграчите и се надевам дека заеднички ќе ги оствариме зацртаните цели„ рече Лазаров.

Со овој договор тој ќе се обиде да го освои единствениот трофеј кој му недостига меѓу 42 освоени во кариерата - трофејот од Лигата на шампионите. Наредната шанса ќе ја има веќе на крајот на мај оваа година во Келн.